香港新浪網 MySinaBlog
« 上一篇 | 下一篇 »
AlexBB | 30th Dec 2010 | All About Love, All About Music | (1740 Reads)
是的,我繼續選擇以回憶與介紹好音樂來懷念我永遠都那麼喜愛的梅姐。今次寫這張於我中一十月那年發行的同名專輯,呀,其實她很多唱片都是同名專輯。為何想起這張呢?因為昨晚看那笑爆咀的頒獎禮,那些跳唱歌手真的丟人現眼,我就想起這一張那年我是喪聽的、以快歌為主的唱片,妖女。

記得那年嘛,派台的應該是將冰山劈開,而買了盒帶回來我聽得最興奮的是第一首妖女,有型到不得了!

 

 

呢個MV勁正,不過搵兩搵,原來當年仲有另一版本,有草蜢出現!  

林振強先生的詞真係無得彈:一句『妖女即將收服BAD BOY』超有型有款!


呢張碟點解當年我咁鍾意?因為快歌多又正!點可以唔數呢首呢?愛將是也!

 

除左當年草蜢仔之外,仲有郭天王未紅時,真係無得頂!有愛將又點可以少得呢首愛醬呢?

呢兩首大熱,將冰山劈開一樣勁HIT!當年就係以梅姐介紹許志安出現,呢首冰山大火下集,個人以歌論歌就覺得冰山大火正D,不過呢首當然都好掂啦!個MV仲好爆添!

有乜咁爆呢?第一,當年許志安真係好老鼠;第二,中間無啦啦有兩個人赤膊打拳,其一疑似冼灝英師傅;第三,梅姐望完佢地打拳既表情,真係超頂癮!

仲有快歌!以上三首改編,呢首係黎小田先生加潘偉源征服他,有冇派過台我唔知,不過可以係大型節目唱,你可想而知,呢隻碟當年幾勁!

 

除此以外仲有幾首快歌:改近藤真彥同名歌曲來來星屑港由林敏驄填詞,一貫其寫詞風格,並不正規,另一首都係佢填詞鍾鎮濤作曲某一天其實應該想寫細細個見過一個男仔,驄哥填得極頂癮:「每次看著這窗 隱隱可見 風中奔跑 他的短褲」,係囉,明晒!仲有一首改日文歌既CRAZY LOVE,係碟內我另一首好鍾意既快歌,夠勁,編曲又正,林振強既詞非常有意境!

快歌講左咁多隻,慢歌三首,首首都好唔錯:首先呢首,又有MV,因為,派過台仲冠軍過架!

 

梅姐個粧勁正啦,不過呢隻歌係林振強為佢度身訂造,因為佢當年真係好多緋聞,呢個MV兩個男主角,其一疑似郭政鴻,嘩哈哈!

痴痴愛一次係本人當年到依家都非常喜歡既梅姐蒼海遺珠,雖然係電影一屋兩妻主題曲,但,呢隻碟太多歌Plug喇,無佢份。本地創作,六分幾鐘咁長,好好聽,而且無冷場。全碟最後一曲,黎小田一首bossa nova作品,兩分幾鐘唯一伴侶,梅姐唱得輕柔憂怨,好有水準架!

我隻碟好新淨?係架!呢隻華星都有出過復刻版,搵搵啦!
 

Related Posts Plugin for WordPress, Blogger...
引用(0) | 話題(音樂)