說到這裡，當然要提的是公司附近太古城的大食代！記得那裡Food Court大變身之後，我都是在寫字樓搬了才第一次在這裡開餐。試了好幾間，己經有鐵膽了。
不如讓我想想這裡有什麼東西吃：韓國菜，日本拉麵定食，Pepper rice，八方雲集，泰國菜，越南河，台灣菜，粥麵，中式小菜蒸魚，扒王之王（已經瓜左），星加坡菜，日式西餐，加上兩間較大間的鐵板燒與及一人火鍋，選擇夠不夠？
我吃過數間（沒有吃過全部店子），八方雲集一直想吃但未吃，Pepper Rice沒有興趣，日式拉麵定食普通粥麵中式小菜與及坡菜沒吃過，剩下的，至愛有以下三間：
永遠排長龍的越南河
打正旗號蔡瀾推介越南牛河，我自從吃過一次就不能自拔！
呢個火車頭河，四十三蚊大碗唔在講，料多又唔在講：肥牛牛丸牛柏葉牛腩牛筋，料仲要靚！每一碗製作過程都係：即時淥好河粉（幼身又滑），碗底先放芽菜，然後放上河粉，再將五樣牛乜牛物滿滿舖在碗上，淋上牛味濃但清甜的湯，阿姐會問你加唔加洋蔥，蔥與及越南香料（我通常都係要勁多），然後自己囉幾多青檸幾多紅椒幾多醋就自己決定，然後，開餐！
首先，肥牛質素好唔錯，牛丸彈牙又有牛味，牛柏葉無雪味仲爽口，最難得係牛筋淋而牛腩又唔算好痴牙，真係四十三蚊勁開心！咁大電，基本上可以兩個女仔Share都得，我就已經食上癮喇！
越食越掛念的台灣菜
呢間係我係大食代既第二最愛！一路食，就會諗起去台灣食唔停既快樂！
呢個三十九蚊套餐，真係唔得佢死！首先介紹配角：肉燥飯：
味道帶少許甜，我鍾意！
呢個鹽酥蠔仔，出奇地好味，而且唔會乾身，Food Court標準已經好好味！不過點都唔及呢個麵線！
台灣食既麵線係唔會糊狀或者太稀，呢個就岩岩好！而且有台灣菜脯，大腸，蒜蓉，芫茜蔥，味道調得唔錯，特別建議大家要辣（佢會問你辣定唔辣），惹味好多！
有日唔食炸蠔仔，揀左蚵仔煎，Surprisingly Good，即製，熱辣辣！
至愛冬蔭功湯底
泰式河粉係第三選擇，又係三十幾蚊有一大碗粉與一個小食：
呢個肥牛冬蔭功冬粉（當日選冬粉），湯底好味，濃淡適中，料多，不過都係建議大家係繁忙時間唔好叫冬粉，因為佢無時間淥透，河粉或者金邊粉啦！
千祈唔好食既，肯定係果間把鬼鐵板燒，唔係果日同事話要試都唔會食，唔平，但質素真係，哈！
等我遲ｄ食多幾間再報告下！亦即係，你午飯時間，好容易係太古大食代遇到我！
