WHAT TO SAY?
－強烈建議林建岳將AMusic摺埋！楊千嬅新碟唔講喇，因為有更得人驚既事：陳淑樺Ｎ加廿幾年前名曲夢醒時份，廿幾年前鄭秀文出道首張唱片首支主打歌叫思念已經改呢隻歌，係廿幾年後既今日，AMusic嫌未玩死衛蘭，由偉大唱片監製雷頌德差唔多照Dub原裝編曲轉左樂器、填詞大師林夕唔知係挑戰自我定係收好多錢，改編夢醒時份成為心有不甘。無問題架衛蘭，盡人事唱得唔錯，不過無特色仲要感覺舊又老土，致敬呀？向新一代介紹李宗盛呀？情牽女人心呢期Hit番咩？
－環球算係近年東亞之外交出唔錯音樂作品既唱片公司，與及佢地俾歌手做音樂自由度都好大，環球更加值得我地支持既係願意捧新人，不過都唔係個個都得。今晚睇完劉美君，Mr.就真係紅爆兼帶動全場氣氛，女新人麥家瑜唱一隻合唱一隻，唔係唱得差，不過唱腔同聲線都無特質，聽完唔會認得，再加埋新唱片果個超大頭以為係謝雪心個女，真係仲有冇碟出都成問題。
－不過肯定好過人去樓空既新人：唐素琪，出左碟無人知，無法啦，亂世出碟，連ｄ所謂阿哥阿姐都自身難保，邊得閒理你？
－古Sir加盟羊棧首張大碟即將推出，地球很危險幾好聽，但睇到新唱片個封套真係嚇死人。係，依家唔會話成日出外景影封套，好多都係Studio影，不過慳Budget都用番ｄ心思同埋美感啦下話。
－雖然我深信G.E.M.將會係香港黎緊樂壇其中一名重要猛將，亦覺得佢唱得好好，不過我從未擁有佢既唱片，因為唱片包裝係幾趕客。新碟我曾經見過果個豪華版，嘩，真係駛唔駛咁大盒，仲要成兩舊水，呢ｄ可能就係細唱片公司要搵多ｄ既原因。
－大同今年應該係本地頒獎禮唔會有乜野大獎，因為年中呢隻翻唱碟中文歌唔多，所以依家夾多隻月亮代表我的心黎谷一谷。問題係：每年年頭出新碟呢個習慣，有冇改先？
－曾經講過，類似超級星光大道比賽，除左有機會捧到新人，亦有機會幫一類唱得好但被忽略或者唔係咁多人認識既歌手有曝光機會，官恩娜係一個例子。最近睇台灣第三季（收費台播慢人地兩季），除左好喜歡黎礎寧之外，我仲認識兼超級喜歡台灣呢位實力派女歌手A.Lin黃麗玲（唔係果ｄ乜模），一口氣搵晒佢既歌黎聽，竟然搵番我最初聽張惠妹既歌既感動！快慢歌都得，英文歌又掂，會努力搵番佢出過三隻碟黎買。
－講開買碟：近來似乎本地唱片加左價，好多隻碟信和／188價都去到九十五蚊，唔知你地覺唔覺呢？
MY TOP 10 CHOICES
１ 這樣的一個麻煩 陳奕迅
（曲：吳青峯 詞：吳青峯 編：李守信／金木義則／梁介洋／黃冠豪／石博元 監：林暐哲）
－過癮！全隻碟最鍾意呢首歌，聽得好開心，下次落Ｋ一定要唱，好鍾意阿臣呢種好隨性既唱法。
２ 他夏了夏天 蘇打綠
（曲：吳青峯 詞：吳青峯 編：蘇打綠／林暐哲 監：林暐哲）
－坦承呢張碟聽得太少，最近細心聽非常喜歡，會試試寫聽後感，都係果樣野：好爽好開心。
３ 雪泥 劉美君
（曲：張慈龍@Sense 詞：林夕 編：Adrian Chan 監：Adrian Chan/劉美君）
－其實全碟好好聽，呢首亦唔係我首選，不過作為一首高質素作品我當會推介：歌詞填得好，而最重要係要呢類歌手先可以Carry到呢類歌。
４ 可可 何韻詩
（曲／編：陳奐仁 /何秉舜 詞：黃偉文 監：何韻詩/陳奐仁/何秉舜）
－人人英雄，身邊希望處處，不要看小自己能量細，其實一樣有你的存在價值。讓我們一起加油！
５ 奇珍異獸 藍奕邦
（曲／詞：藍奕邦 編：Ted Lo 監：藍奕邦/徐繼宗/伍仲衡）
－小有的藍奕邦音樂類型！首先Ted Lo呢個好豐富既編曲令到呢首百獸同場既歌曲更精彩，阿邦呢份詞亦係令人想到好多，就好似現實社會寫照。佢亦嘗試以不同唱腔演繹，不過唔夠果種黑色幽默諷刺感覺。
６ 若你碰到他 蔡健雅
（曲／詞／監：蔡健雅 編：蔡健雅／Doug Petty）
－開始發覺蔡健雅近年歌曲對於失戀沉溺人士並不宜多聽，太過到肉，而且會更自憐。呢首係其中一首。
７ 慕容雪 薛凱琪
（曲：方大同 詞：林若寧 編：Edward Chan/方大同 監：Edward Chan/Charles Lee）
－阿Fi唱得不俗，當然唔算Handle得好好，但感情投放好唔錯。喜歡呢個旋律，但林若寧既詞，有點空泛。
８ 安樂 at17
（曲：盧凱彤 詞：于逸堯 編：于逸堯／李端嫻 監：于逸堯／李端嫻／at17）
－好平靜，特別係生處繁囂都市要面對太多太多之時，請聽聽這歌。
９ 顛倒夢想 麥浚龍
（曲：馮穎琪 詞：林夕 編：何秉舜 監：麥浚龍／何秉舜）
－依然得不到應有的推介與迴嚮，可惜！請支持好音樂！
１０ 月亮說 王菀之
（曲／詞：王菀之 編／監：馮翰銘）
－可以好肯定呢首會係我全年十大之一。
MY RECOMMENDATIONS
其實依家睇我聽後感會詳細好多，不過有幾張未寫既都想提提：劉美君新碟係好有水準，越聽越喜歡；王菀之，不枉等咁耐，好正！阿邦隻碟當然好，依家研究係佢歌曲編排，仲未睇隻DVD；阿Fi，好唔夠喉囉，幾隻歌！
MY RETRO RECOMMENDATIONS
話說尋晚睇劉美君蝙蝠之夜音樂會，佢唱左三首舊歌Side Cuts，真係好正，想介紹大家聽聽：
首先係第二張大碟《點解》最後一Cut，由佢前夫填詞既自甘墮落，五分幾鐘，寫盡風塵女子心聲，唔知一眾援交女聽唔聽得明呢？
之後係到依家聽都覺得幾勁既《赤裸感覺》大碟，碟內有呢首講做人情婦既事前，留意歌詞，有機會又聽埋首事後，事成。
最後呢首，一唱，我就嘩左出黎！真正劉美君筍歌，《被你縱壞》大碟內，不可能說的夢！！！！！
只可以話你知，現場版正好多呀！
