香港新浪網 MySinaBlog
« 上一篇 | 下一篇 »
AlexBB | 31st Jul 2009 | All About Music | (966 Reads)

WHAT TO SAY?

講講派台歌:嘩城城去台灣開演唱會整首聽傲江湖,小美姐果d一起乜渴望感動舞動又黎喇!城城既國語Ai...成首歌,令我諗起...好岩另一位城城唱,張如城。

知唔知邊個係黃婉佩?唔緊要,仲記唔記得乜野係2R?得!Race知喇卦,佢果本寫真個封面咁咩,佢原來仲對樂壇未死心架!全新歌曲叫十分鐘,我可以肯定你聽完十次都唔會記得。

Sammi姐出山喇,搵黎何山黃偉文加蔡德才製作新歌叮叮噹,聽完唔驚喜,而最得意係,同公司剛剛有首王菀之大笨鐘,Sammi姐又唱London大笨鐘,點解呢?

所以話,一個好歌手若果遇上一間細公司唔識推介你真係好慘,睇住李卓庭越黎越無勢真係令人好心痛。新歌All Is Fine是林一峰曲詞包辦作品,但一峰既詞完全唔壓韻,而且唔覺得特別好聽,好弊!

英皇硬捧舞王威廉淫,新唱片坊間可以話一致劣評,不過我好記得最近行信和,門口都見到一個以為佢參選港男既半裸男,係,就係威廉淫。狄易達講得岩,你係賣藝嘛,人地,賣肉囉。佢唔好再Sell佢好礙耳既假音啦,夠喇!

我無睇錯嘛?做乜商台無啦啦黎谷地盡頭呀?有乜野玄機呀?

大同做乜唱廣東歌?一時之間未接受到呀!

Last Question:有冇朋友可以介紹一下方欣浩既背境?佢唱既歡迎我嗎?自彈自唱好舒服,應該係宣揚禁毒歌,無說教感覺,但來得真誠感動。(多謝有朋友介紹,原來這歌可以免費下載,誠意介紹大家聽聽,的確是用來支持正生書院的。)

MY TOP 10 CHOICES

1 向前走 藍奕邦

(曲/詞:藍奕邦 編:Ted Lo 監:藍奕邦/徐繼宗/伍仲衡)
-藍奕邦系列『邦』首支派台歌,一聽,再看歌詞,很感動,很正面,為我們這些三十幾的人聽來更加喜歡,熱切期待這張唱片。

2 突然念舊 黎明

(曲/編/監:伍樂城 詞:黃仲凱)
-其實黎先生唱呢類歌係有一種微妙的感動:上一次事過境遷感動,這次突然念舊也一樣,編曲不會太Complicated,只靠黎先生聲音如說故事般唱出,你可以說老土,但真摯。

3 滴滴滴 許哲珮

(曲/詞:許哲珮 編:姚小民 監:許哲珮/陳建良)
-我話你知,呢隻碟好舒服好甜好甜,呢隻當然一樣好甜,係甜到漏果種,輕輕柔柔,聽到會笑架!

4 如果我是陳奕迅 Mr

(曲:Alan Po 詞:Dash/小克 編:Mr. 監:Gary Tong/CY Kong/Davy Chan)
-把聲似,然後唱陳奕迅,個人喜歡呢首多過夾硬泥,小克歌詞好似真係好了解阿迅咁,Mr.既Rock係我受得黎幾喜歡果隻。

5 Yes I Do 林海峰

(曲/編/監:陳奐仁 詞:林海峰)
-Hanjen將佢玩得好開心既Jazz帶俾Jan,仲黎一次百老匯式Big Band Jazz,完全屬於舞台表演既一首歌,而且好Lum,最後「是我畢生大志」唔知林太係台下聽到會唔會喊呢?

6 我最喜歡的歌 謝安琪

(曲/詞/監:Eric Kwok 詞:林若寧)
-字裡行奸係咪死得好慘呀d播放率?呢首都唔睇好,係咁俾佢放開其他歌手仲有得追?但我好鍾意呢首三拍子歌,比起年度之歌感動得多。

7 十字路 胡琳/恭碩良

(曲/編/監:恭碩良 詞:林若寧)
-一首好有Mood而且將兩人關係形容如駕車遇上十字路口爭拗的詞,並非一般K歌合唱情歌,而是兩人唱出那份無奈與回不了頭的感覺,極力推介!

8 密封罩 周國賢

(曲:周國賢 詞:藍奕邦 編:周國賢/陳輝陽 監:陳輝陽/崔炎德/林健華)
-久違了的名字,陳輝陽,以鋼琴作這歌引子很成功,與那份自閉沉溺傷痛的歌詞配合極了,是一首越聽越痛的歌。

9 All About You G.E.M.

(曲:Marc Nelkin 詞:G.E.M. 編/監:Lupo Groinig)
-除了用勁之外都唔知可以講乜:低音到高音掌握得極好,你點講都唔會估佢唔夠廿歲,有Power得來唔會Show Off,仲要自己填埋詞,以後仲唔係你既世界?

10 借 鄭融

(曲:鄧智偉 詞:陳少琪 編:Johnny Yim 監:莊冬昕)
-鄭融一快一慢派台策略之下,今次呢首慢歌其實Melody極唔錯,不過詞就又係差少少,但佢唱得好,將果份唔知係唔係同你係情人定朋友既感覺表達,仲好易上口添!

MY RECOMMENDATIONS

去完台北一轉,唱片多到聽唔晒,不過可以講既係,小宇我聽得非常喜歡,第一隻碟同呢隻就站在這裡都非常好玩,會介紹;之後就係許哲珮美好的,唔可以唔寫,因為好舒服;高以愛製作上唔夠好,但佢唱得好,所以我又聽得幾過癮;徐佳瑩唔錯,把聲好舒服,歌曲亦多樣化。

本地方面,鄭融隻新曲加精選極抵買,我應該會介紹一下。

舊歌推介暫停一期,有點忙。