WHAT TO SAY?
係咪好奇怪我唔寫屎上最強呢？因為我聽完睇番段片真係唔知講乜好，唯一諗到就係：黃柏高先生，你近年既出品真係精彩都無倫，你就黎開始取代蛋記成為樂壇垃圾站喇！
要有樣睇之嘛係咪？我介紹你啦，有個叫蕭希榆既女仔，唱得作得仲睇得。佢係邊個？Ｎ年前以蕭瀟出碟，台灣都出過叫好ＯＫ叫座既唱片，然後突然人間蒸發。佢有最新廣東派台歌，叫倒刺，走Rock路線，不妨留意下。
大家都知黎緊大同會同軒仔拉闊啦可？我既分就到晒期換晒野喇，大家留意喇！BTW，大同隻碟係台灣仲賣得好好，企得幾硬，同期梁文音都跌到廿位喇，佢仲係十幾！
衛蘭果首999有幸係UTube睇過個MV，隻歌係點唔講住，但佢個Look係咪得罪左人？令我諗起家燕姐幫威馬電器拍廣告個Look，真係好爆笑！Anyway，希望家燕姐身體健康啦！
有時都話好佩服有歌手繼續有歌出：夢夢姐有新歌派台喇，叫做一走了之，唱Ｋ質素，你會明白點解佢唱極唔起，不如我幫佢度條橋啦！話隻歌要黎串佢師妹乜乜之，咪又可以見報囉，再唔係搵乜乜之黎合唱丫，都得架！
另一位屢敗屢戰叫莫鎮賢先生，佢都好ｄ，叫做有一首情罪Hit過，最近又出黎，派台歌製作班底：倫永亮加張美賢，點知出黎效果真係八十過八十年代既慢歌，嗯，佢係咪自資架？
古巨基開演唱會，唔知佢係咪古Sir上身，個演唱會Poster我以為係兒童節目又或者係小太陽之類既表演，邊個諗出黎架！佢已經唔細架喇！
謝安琪一日唔派吶喊，年度之歌一日都唔會係我推介十大。希望佢好好唱果七場演唱會，唔好令一眾睇死佢既人得呈。
叱吒已死。以前真係可以一個歌手有兩首歌同時係榜出現，今個星期都係，不過係野仔，喂？
MY TOP 10 CHOICES
１ 我愛你 王菲
（曲／編／監：張亞東 詞：蕭瑋）
－餓佢既歌太耐，又或者，市面上無佢呢類歌手既音樂，某星期六聽住報榜一聽幾句已經知係佢，嗯，其實佢復唔復出無問題，久唔久有歌俾我地聽下已經夠高興。
２ 我愛你 盧廣仲
（曲／詞：盧廣仲 編：鍾成虎／陳柏州／盧廣仲 監：鍾成虎）
－無架，佢派台，咁過癮，唱呢三粒字可以玩到咁，無理由唔推一推俾仲未識佢既朋友嘛！BTW，佢個Concert好睇嗎？
３ 七百年後 陳奕迅
（曲／編：柳重言 詞：林若寧 監：柳重言／CY Kong／陳奕迅／Davy Chan）
－我已經識唱喇！好似K都有得唱，我要快D去唱先！BTW，K連我至愛之一於心有愧都有得唱呀！
４ 賴床 藍奕邦
（曲／詞：藍奕邦 編：Terry Chan／藍奕邦 監：陳德建／藍奕邦）
－叫好係唔夠既，希望大家買佢隻碟聽下，特別係我地呢類三字頭既朋友，你會搵番青春時候既無奈。
５ 搜神記 容祖兒
（曲：Christopher Chak 詞：林夕 編：陳珀 監：Alvin Leong）
－同樣是Christoper Chak，呢首都係帶小調味道，比起年度之歌旋律起伏豐富得多，容祖兒亦唱得好聽。
６ 不呼不吸幾多秒 薛凱琪
（曲／編：方大同 詞：周耀輝 監：方大同／崔炎德）
－哈哈哈，港台仲快過商台俾呢隻歌做冠軍歌，希望阿Fi今年叱吒開齋，囉番個女歌手獎啦！
７ Never Say Never 徐偉賢
（曲／詞：徐偉賢 編：Johnny Yim 監：金培達）
－宗教歌曲，配合Nick Vujicic（四肢殘缺的外國朋友）佈道會，充滿正能量。一直喜歡徐偉賢既歌聲，佢今次呢張唱片全部都係宗教歌曲，但好唔錯，我遲少少會介紹。
８ 快樂很我們 At17
（曲：林二汶 詞：周耀輝 編：李端嫻 監：李端嫻／At17）
－周耀輝用一個好得意既方式去寫呢首歌：用人黎作形容詞，有趣！音樂風格我硬係諗起似唔知邊首歌，下次有機會講番。
９ 三人遊 方大同
（曲／編：方大同 詞：崔惟楷 監：方大同／Charles Lee／Edward Chan）
－不如估下商台俾唔俾佢冠軍歌，同埋下一手派乜野啦！我真係好想佢派1234567。
１０ Light Up Your Dreams 林一峰
（曲／詞／編／監：林一峰）
－你有冇熄燈？我有呀！呢首歌係好Fresh好Green好舒服好開心，係最原始最無污染既林一峰。
MY RECOMMENDATIONS
陳奕迅係一定要買既！謝安琪你可以等第二版！另外應該都係等台灣會出既新碟喇，例如曹格咁啦。
MY RETRO RECOMMENDATIONS
事緣係：星期五晚好耐都未試過係我屋企有牌打，一邊睇住音樂台播舊mv，好多首都好開心，睇到許志安喜歡你是你，發現無線搵個A貨Sammi扮MV女角，好得人驚，遠睇呃到人，近睇嚇親人。於是諗起當年既Sammi：一九九零年首張大碟除左派台改編陳淑樺夢醒時份既思念之外，想介紹兩首俾大家聽：
第一首係同草蜢撞歌，改編自竹內瑪莉亞作品，草蜢版本好多人識：原諒我是我，Sammi姐版本叫做離別，陳少琪填詞：
咦，又係用原諒開始架播！
另一首就少d人知撞歌喇，就係同慧敏姐首天荒愛未老撞左，改編英文歌A Long And Lasting Love，Sammi姐個版本叫幻滅，潘源良填詞：
個人覺得Sammi姐唱得硬淨左少少囉。
嗯，我黎緊會介紹一隻舊國語碟，希望你地鍾意。
