相信不少跟我一樣聽中文流行曲大又是七幾年出世的都會對華星有情意結，因為這公司有不少歌星與歌曲都屬經典，而且對每個這個年紀的人有獨特的回憶。華星之後執笠但死Keep唱片版權唔放又無新作，曾經推出核突復刻版但因為無所以焗住買，直至知道偉大的娛樂大亨林先生買入所有華星歌曲版權，我等樂迷簡直覺得是大事－－特別是，現時的歌曲水準．．．
林生咁貴買當然要努力用華星個朵與及當中歌曲賺番筆，非常打鐵趁熱就係去年年底舉行的東亞華星演唱會。我未有到現場欣賞（而當時曾經想過買票），但最近亦買了這張現場大碟。
首先要解拆一下演唱會名字：東亞華星，即係並非一個華星回憶演唱會。同時林生旗下藝人跟華星有關係既有許志安楊千嬅鄭秀文何韻詩劉浩龍劉德華黎明，最後果位係老闆多過歌手，唔俾面就唔俾面，不過佢係華星年代都無乜經典作品，出唔出現都無所謂。其他呢？極其量係聽華星作品大，但正如演唱會名：東亞行先，當然要黎一次東亞群星大晒冷。所以整個演唱會如何晒冷如何平衡一眾入場觀眾對於華星兩粒字的期望又唔會悶勁多廁所位，好考功夫。
演唱會創作總監為郭啟華先生，一個曾經在華星某年代話過事的人當然有資格統籌，於是未聽之前只睇歌曲Rundown，其實幾唔錯：許何楊鄭四人分段出場，劉華大帝壓軸前出場只因其地位但其實佢係華星都係出過一隻碟咁大把，其他歌手獲分唱歌次數某程度上亦顯示唱片公司重視程度，不過重視還重視，實力又是另一回事，同時人材濟濟亦要分門別類，能夠將整個Rundown分得好好睇睇，極具難度。
先講幾位華字派歌星表現：許志安未有令人失望，一連十首華星年代首本名曲Medley的確勾起不少回憶；鄭秀文短短三首快歌已經聽出壓台感與現場氣氛，唱出梅姐女人心感情分很高，可以有另一種味道，當然最最令人覺得往事只能回味就係你唱我和的唯獨你是不可取替，雖然，如果俾我揀，無其實你心裡有沒有我都老老土土唱番次非一般愛火丫。
何韻詩Solo部份選唱華星歌曲太少，雖然表現好好，不過只有半首光榮之家實在唔夠，起碼都應該有千千萬萬個我（你唔好話我知你聽到小丸子的心事好高興）；至於佢同安仔合唱將冰山劈開大家只應該當係一份回憶，而唔係比較。
相比之下楊千嬅表現令人失望：失望一：Medley只有四首歌，係唱片只收錄四首定係真正只唱四首，佢係華星好歌之外根本可以有一首好Proper既Medley令人回味；失望二：四首，都唱得唔好，連隨撈月亮的人都係勉勉強強，唉；同尹子維連唱兩首唔算得係好，出奇既係尹子維唱得唔錯，可以獲得與千嬅合唱兩曲，東亞應該幾重視佢。
其他歌手表現，至愛首推王菀之自彈自唱纏綿遊戲與及迷人Pink Lady，前者連前段歌劇都唱埋非常動聽，後者唱出另類Cutie感覺，正！之後要數就係林氏兄弟一峰加At17，Acoustic問誰領風騷好玩過癮，不要重播驚喜不大，At17版本的天大地大絕不失禮偶象，可惜呢個組合就被夾硬加入任賢齊而被沾污－－喂大佬，你廣東話唱成咁，我絕對只會當你唱影帝既朦朧夜雨裡，但真係好Ｘ難聽！
兒歌Medley呢一著果真好玩：一來華星的確有好多經典兒歌，二來唱兒歌對於某類唔唱得既東亞群星係一件比較無咁易出事既工作，可惜，衛詩方皓文黃鎧晴一樣表現強差人意，特別係現時駐日本果位－－大佬，叮噹主題曲咁易唱你都唱成咁，不如由At17唱晒好過啦！
劉浩龍藍奕邦黃宗澤翻唱小虎隊兩首歌只聽相片聽歌都覺得過癮，同時兩個唱得伴一個唔唱得亦睇得出東亞既心思，不過當黃先生獨唱一曲就相信肯定係廁所位，亦為藍奕邦連一首Solo都無覺得非常唔抵！
劉華大帝唱EMI與華納年代名曲其實格格不入，不過都算，反正佢唱華星名曲只知道此刻愛你肯定劉華咁多年唱歌有進步，但係對於佢「強姦」哥哥名曲為妳鍾情我真係聽到好嬲－－前半段大戲腔都算，後半段扮哥哥腔，實在係侮辱！
根據有到現場睇既朋友都話個Concert好睇，我相信都會好睇，因為歌曲與歌手編排不俗，不過，若果有一日，有一個真真正正華星懷念演唱會，有陳奕迅楊千嬅鄭秀文許志安梁漢文何韻詩郭富城的話，八百蚊張飛我都會入場睇。
咦？唔講起都唔覺，點解成個東亞華星演唱會，一首城城名作都無既？
AlexBB | 13th Mar 2009 |
All About Music | (1485 Reads)
[1] 你估錯了
[2]
|
華星絕技係邊個走就狂出佢精選碟，但城城一路都無乜…我都諗咗好耐點解(小學時小的係佢忠心粉…囧…)… 我諗係因為佢當年國語碟係台灣年代代理掛…版權錢要同人分一半…但廣東碟…無理由唔翻炒啦…嗚… 仲以為聽呢隻碟可以勾起翻啲集體回憶…看來…umum…可以慳番了… btw…劉華大帝的《只知道此刻愛你》其實都不錯的…係個銀衫封面相當攞膽… |
|
[3]
[5]
|
鄭秀文唱的女人心的確很有味道，聽得出是用心唱的 |
|
[6] Re: 公主
[7] Re: domotoiceko
[8] Re: 毫無人性
[10] Re: Mr RiceBall
[12] Re: Holf Yuen
[13] Re: AlexBB
