WHAT TO SAY?

二月只得廿八日，但好歌都唔少，不過有ｄ歌真係令我幾不安：某晚無線音樂台播出周麗淇小姐果首猜燈謎，佢唱成點大家無期望，但係歌詞真係令我Ｒ爆頭，佢想講乜呀？？？

Soler輸官司要還五百萬（嘩！），新歌派台，跌左落地：呢個年代走去唱小鳳姐首風的季節變Rock版？不如將咀香園隻歌派台好過啦！

有時真係估唔到點解會派舊歌上台：繼郭小霖先生果首錯之後，周迅派左首上年既窗外，新城仲慘！因為黎緊有曹格開Show，曹公子又未派新歌，無歌可谷走去谷一年前既奈斯男孩，你話，樂壇幾得人驚！

多謝Moov醒我兩個月全面通行証，俾機會我聽好多新歌：UFO小姐果首花吃了這女孩聽得出，Engineer執得好辛苦；江若能小姐直接接收Twins當年唱五六成系列必殺Ｋ歌旁觀者傷，唱功一樣咁Green，拉牛上樹咪就係咁解囉。

李克勤派錯歌！第三Plug應該係廉價哀傷，而唔係呢首太悶既萬年孤寂！我可以幾敢肯定，商台唔會大播。

有幸於Youtube睇番當年仲箍緊牙既阿Kay唱Make A Love Song原版For You參加流行曲創作大賽片段，嗯，如果阿Kay唱呢首歌原來個Groove出咁多架播。

MY TOP 10 CHOICES

１　So I Say　蘇永康
（曲／編：方大同　詞：黃偉文　監：雷頌德）
－可以堪稱咁多位男歌手唱大同作品唱得最好：夠Soul夠有型有瀟灑，大同編曲夠懷舊，加埋開首既舊Brass聲，好正呀！

２　不呼不吸幾多秒　薛凱琪
（曲／編：方大同　詞：周耀輝　監：方大同／崔炎德）
－只此一家方大同加薛凱琪甜蜜蜜少女懷春總是詩好易有糖尿病殺死人情歌一首，你，頂得住無？

３　三人遊　方大同
（曲／編：方大同　詞：崔惟楷　監：方大同／Charles Lee／Edward Chan）
－如果俾我揀，一定係小小蟲或者1234567，不過當然啦，首首都唔錯，各有心頭好係好正常。呢首就隱隱作痛，唔夠甜囉。

４　太陽　陳綺貞
（曲／詞／監：陳綺貞　編：林羿妏／陳綺貞／鍾成虎／陳柏州）
－除左講太好，與及你無理由唔買同唔聽之外，我都係無話可說，陳綺貞，太陽，好好享受！

５　查理淑儀　何韻詩
（曲：林雅慧／陳奐仁　詞：黃偉文　編／監：何秉舜）
－原本屬於平平淡淡一首歌，不過當知道背後故事之後，整首歌好暖，充滿愛。

６　賴床　藍奕邦
（曲／詞：藍奕邦　編：Terry Chan／藍奕邦　監：陳德建／藍奕邦）
－「奕」已經推出，比「藍」更精彩，呢首帶點搖滾，繼續藍奕邦獨有有點孤辟感覺，比較陰暗，但喜歡。

７　Allegro Opus 3.3am　陳奕迅
（曲：Gary Tong　詞：小克　編：Gary Tong/Ivan Leung　監：Gary Tong/Davy Chan/C.Y./Eason）
－提提你：Moov Live陳奕迅有飛賣，自己上去睇下啦！新碟三月出，絕對期待！

８　祝英台　謝安琪
（曲／編：Cousin Fung　詞／監：周博賢）
－流行程度並不是另一首囍帖街，因為並非咁襟聽，但依然係高水準作品。

９　錯　郭小霖
（曲／詞：Tinka　編：郭小霖　監：郭小霖／Tinka）
－越聽越有Mood，市面上無乜幾多個廣東男歌手唱出呢種R&B感覺，唔知大家搵唔搵到呢隻碟呢？

１０　Make A Love Song　Chita
（曲／詞：Chita　編：A.T.　監：Chita／A.T.）
－雖然話不及當年果個版，但我最近都非常喜歡佢呢個版本，希望下一首派台歌可以俾多些驚喜我地。

MY RECOMMENDATIONS

必買兩張唱片：王菀之我來自火星演唱會Live，真係好好好好聽，佢唱得好仲要聽得出現場氣氛好好，佢唱阿菲既開到荼蘼係估你唔到咁出色，真係值得買！

另一隻？藍奕邦「奕」，我實寫！

MY RETRO RECOMMENDATIONS

突然想起呢首歌，呢位視帝出自名師，仲跟過兩位名師添！改編日文作品，當年一聽就好喜歡，雖然佢唱得硬係有少少跟唔到個Beat，但好有感覺：　

鄭嘉穎先生好多好多好多年前作品：夢想國。