－可喜可賀：夏至小姐正式告別主持叱吒樂壇！以佢訪問欠技巧扮可愛與及對流行音樂知識之貧乏，早就唔應該主持呢個節目。唔知商二音樂總監仲係唔係佢呢？不過，聽講，佢話會專注填詞，喎！
－又某一日睇商台春茗新聞，某某高層表示今年商二會多播歌。咪住先，多播歌係咪繼續叫DJ跟Songlist播先？呢排Vani代細蘇做叱吒，成日話：「呢首歌得到我地903各DJ支持熱播。」我聽到都忍唔住冷笑。
－我成日都會去「係亞洲」睇有乜新碟出，岩岩一去，見到華語暢銷榜，嘩！去片：
真係唔知講乜好，呵！
－講起新碟，知唔知乜野係「優秀男聲」？無錯，係英皇將兩名佢地辦既新秀得獎者二合一出隻雙CD，分別係王凱駿及扈佳榮。兩人都有新歌派台，前者果首叫大傻，嗯，唱歌似讀書，令我諗起唔知點解仲有碟出既方力申果首乜乜沒傻瓜，過耳即忘；後者果首叫我沒有錢，呢位把聲比較有特色，不過個樣就真係難Sell。
－講講佢地位師兄吳浩康：其實佢最近兩三隻碟真係仆得幾直，電台又唔係好播，最新呢隻尤其嚴重。雖然唔知點解英皇仲同佢出碟，但同時覺得佢質素值得更紅，係英皇唔識捧定係佢命水唔好呢？
－唔駛錢睇雜誌，UFO女神出新EP，兩個封面喎，扮日本妹喎，其實班小弟弟係咪咁Lum佢呢？講起佢，最近電視有佢個廣告，同小肥有首合唱歌。唔係想講首歌，而係，對唔住，小肥個樣真係，嗯，心照。
－最近聽到梁詠琪為電影有廣東歌派台，叫愛得起，個人覺得唔知係咪太耐無聽佢唱廣東歌，唔錯既。
－一直堅持要等埋阿嬌同埋I WILL BE BACK既阿Sa終於要單飛出碟，第一首叫二缺一，周博賢出品，唱得比預期好，不過聽左Live再講。
－Surprise係：聽聞郭小霖先生今年開演唱會，係真的話，必去！至於最近派台果首錯係來自佢兩年定三年前出既碟，叫「龍捲風2006」，HMV獨家發售，各位舊歌迷，入定貨先去睇演唱會啦！
－方大同繼續成為熱捧對象：我既意思係，有佢既作品既歌手繼續派台，繼李克勤今夕是何年之後，蘇永康派So I Say，薛凱琪將全隻碟所有既大同作品派埋，最新係不呼不吸幾多秒，唔怪得知大同話要放假作歌為歌債啦！
－關於謝安琪，講講佢首祝英台：不如由周博賢自己講啦！
－BMA新人Chita余翠芝首支派台歌Make A Love Song幾好聽，唱得有板有眼，不過Miss左睇佢上勁歌唱Live，點解佢之前作俾關心妍果首沿途有你悶咁多既？
－剛才睇無記音樂台，播左阿詩既免費音樂會，好開心啊！又有Eason又有At17，點解無人話我知點有得去既？講番阿詩，點解美空雲雀無啦啦上番榜？點解揀較為平淡既查理淑儀派台既？
－其實如果唔係夜晚個節目係咁播，你地會唔會鍾意聽Harlem既愛你的只得一個我？佢隻碟派第二首歌，葉子，原唱阿桑，我覺得原唱好聽好多囉。
－珠光寶氣播完，咁多首劇集歌會唔會出Soundtrack呢？Shirley果隻好正架嘛！仲有黎姿唔好聽但有紀念價值收山前歌唱作品呢！
－新碟，繼續陳綺貞方大同王若琳，陳綺貞終於派歌上台：太陽，基本上邊隻我都覺得好聽架喇。Joanna演唱會D飛太貴喇！真係唔捨得買，仲要係聲麻麻既Star Hall！
－至於方大同，出第二版！我原本唔鼓勵大家去支持架喇，不過隻第二版送既DVD有台北誠品演唱會，唱左成十首歌呀！另外幾首MV之中，黑白個MV真係型到呢．．．講到咁，即係，我買左啦！咁我都要話俾大家知：第一版包裝靚好多。
－希望有時間寫寫兩隻碟：Today Special與及Smile，雖然係舊碟，不過都有野想寫。
