新年快樂！估唔到一首唱旺０９都未及呢首勁：夢幻之聲賀新晞！邊個唱？有麻甩至愛趙碩之（佢係歌手？）有一個都唔知佢係邊個既尹蓁晞，最最最勁係大家姐：樂壇曱甴戴夢夢，永遠打不死，全靠佢教我喳遮使我壯闊一些，鍾唔鍾意先？
咁，點解唱旺０９可以上叱吒榜，夢夢之之呢隻唔得先？點解叱吒榜淪落到唔駛驚會第二位先？
我眼中一直有一類歌手係唔明白佢點解繼續有碟出，夢夢姐係呢一類，英皇都有一兩個，依家多左個：日日運動身體好既方力根。悶歌一隻接一隻，但又繼續有碟出－－我記起柏高先生話要捧佢做最受歡迎男歌手，幾時話？依家連No Show既豬肉獎今年都無埋，好難爭播。
港台個榜越黎越勁：第九位：一種快樂一種苦（狄易達／JJ）係咪因為人地喊晒話無得爭新人獎夾硬俾佢上榜呢？
話說欣宜同學友有首合唱歌，應該係迪迪尼卡通片主題曲，叫做失去便掛念。欣宜唱得好好，有Groove有Power，唯一要挑剔就係中文咬字好似有少少唔自然，加油呀！
MONTHLY TOP 10 FAVORITES
１ 事過境遷 黎明
（曲／編／監：陳奐仁 詞：林若寧）
－不會太多，不會太少，就是那種帶有遺憾的回味，不會一下子讓你痛徹心底，卻是越想越難過。
２ Allegro Opus 3.3am 陳奕迅
（曲：Gary Tong 詞：小克 編：Gary Tong/Ivan Leung 監：Gary Tong/Davy Chan/C.Y./Eason）
－小克份詞好正，Eason超放演繹更正，Big Band Sound編曲極配合，聽得你好爽好高興。原名叫Sad Song，係講填詞人嘔唔出歌詞既苦況。
３ 黑白 方大同
（曲／編：方大同 詞：周耀輝 監：Edward Chan/Charles Lee/方大同）
－好岩黃昏聽既一首歌，好甜好甜，由大同一開口唱開始已經醉人到不得了。
４ 甜蜜蜜 薛凱琪
（曲／編：方大同 詞：黃偉文 監：方大同／崔炎德）
－有一日睇無記播呢隻歌個MV，唔知係咪台灣拍架呢？同愛人一齊一Lum就會整個人昇起，好甜好甜呀又係！
５ 祝英台 謝安琪
（曲／編：Cousin Fung 詞／監：周博賢）
－份詞填得好靚，周博賢真係估佢唔到；阿Kay唱得好好，唔會太多太小，問題係：呢一代既人，對於呢個題材，興趣有幾大？題外話：果幾本同英記有關雜誌輪住黎寫衰謝安琪，仲要話人分居，唔知會唔會搵律師告佢地呢？
６ 玻璃色 王菀之
（曲：王菀之 詞：藍奕邦 編／監：馮翰銘）
－睇過報導藍奕邦填呢份詞俾Ivana係形容Ivana既性格，呢首歌，好清新舒服，亦係Ivana係現今樂壇少有既特質。
７ 演歌 陳珊妮
（曲／詞／編：陳珊妮 監：DJ小四）
－Flamingo曲式，唱的卻是傷感被飛故事，但係慘得黎有型有款播！
８ 戰禍 Mr
(曲：Alan Po 詞：Dash 編：Mr. 監：Gary Tong/C.Y.）
－一首夠火喉訊息正面叫我地生於和平地要識得珍惜既歌，流行程度亦夠，應該支持。題外話：派台版有冇之前果段口訊架？
９ 八陣圖與旅客 麥浚龍
（曲：張繼聰 詞：周耀輝 編／監：王雙駿）
－編曲似曾相識，歌詞要好有想象力先可以意會當中意思，但係整體感覺幾Lum架播。
１０ 最幸福的事 梁文音
（曲：劉宜 詞：馬嵩惟 編：林於賢 監：阿弟仔）
－繼續推介呢位新人，呢首往事只能回味的情歌。
MY RECOMMENDATIONS
無得講，一定係王若琳與陳綺貞：前者兩隻碟真係精彩到飛起，我仲諗緊寫唔寫因為英文歌真係唔在行，唯一想講就係佢不如狠心唱晒英文啦！中文始終表現差少少；陳綺貞，我只有嘩嘩嘩嘩嘩，上埋Youtube睇兩首歌個MV更嘩多幾聲，放心，實寫。
之前話會寫既王力宏不日推出，原來唔多噤聽。
MY RETRO RECOMMENDATIONS
突然想起趙學而當年同英皇分手時，二千年推出一張新曲加精選，當時只係派左首慢慢來已經令大家回味再三，但我想介紹另外兩首歌：
呢首叫未，曲編監黃尚偉，詞黃偉文，其實學而唔止唱慢歌得，唱呢類又或者迷迷地既謫仙記都一樣咁掂架！
無錯，國語歌，其實首歌你地覺唔覺似邊首曾經熱爆Ｋ場廣東歌呢？無錯，就係絕，原因係都係陳輝陽作品，而填詞正正係絕既主唱者，唔知點解仲係寫高雪嵐既傅珮嘉，更有趣係監製係台灣現時依然紅極幕後人阿弟仔（睇睇梁文音首歌），絕對有理由相信，學而當年係有打算去台灣出國語碟。你地覺得呢首歌點呢？
