思前想後，真係做唔到每半個月推介，但有聽歌既我當然可以咁寫：月中就寫寫有乜歌同唱片想講，仲有有關流行音樂感想：
－十大中文金曲真係有型：一事無成我唔知原來係紅，更奇係分手要狠；小酒窩係全國最佳金曲我真係唔知講乜，再加上泳兒果首乜鬼好累係優秀流行國語歌曲（點解有兩首唔係一首）同埋加上陳偉霆囉金王祖藍囉銅新人，容祖兒竟然係全國最佳女歌手．．．咦？仲有冇武映行動呀？
－講開ＵＦＯ女神傅穎，最近有借錢公司搵左佢開Mini Concert，好似去借錢有飛送。嗯，傅穎無得做我要跳係咁跳代言人就轉戰成為勸人唔好借錢大使，佢真係有好機會做傑青播！
－台灣唱片銷量榜發生買榜疑雲，其實嘛，每張唱片真真正正賣幾多唱片公司賺幾多自己最清楚，香港Ｈ記果類銷量冠軍有幾驚喜都唔駛點講亦唔駛解釋係點，仲有邊個會當呢類銷量冠軍係乜野一回事，大家心照啦！
－以為Twins不再英皇唔會再整賀年歌，點知都有！究竟有冇人買架呢？
－未講新歌之前，咦？點解郭小霖會將佢成年幾前出既碟既歌係年幾兩年後囉黎派台？真係有趣！
－即將有一個全本地創作流行音樂劇星光大道，演出者有林志美，李卓庭，白嘉倩等等，林志美已經有同名主題曲派台，不錯的，值得留意。
－呢期最令我不安派台歌，除左英皇賀年歌之外，肯定係麟李既唔駛驚：唔得呀！我買左隻Today Special第一次鼓起勇氣諗住點都聽一次丫（第十一Cut），點知聽左半首我忍唔住停，情況同千嬅隻碟最後果Cut一樣：我每次播隻碟一定播到尾二果Cut就會停。
－另一種令我好不安既係跳舞好勁既狄易達與及成日話大家唔接受佢做歌手既
－最最驚喜一定係陳奕迅先生Ｘ小克填詞Big Band Sound玩野之作Allegro Opus 3.3am！小克將填詞人被迫交貨諗唔到寫乜情況好有畫面又抵死過癮描述，當中仲向幾位填詞人致敬，陳奕迅唱得夠癲夠放，爽呀！
－另一驚喜就係黎明先生事過境遷：簡單結他，黎明用最無花巧但飽歷滄桑既聲音唱出，林若寧寫得好有細節既歌詞，回憶已經遠走的舊愛，夜深人靜每次聽著，心都會忍忍作痛。
－方大同黑白叱吒依家先播，無緊要，佢隻碟今次大把歌好Plug，而我最近腦海時常浮現有兩首：Singalongsong與及1234567，點解呢？
－陳珊妮第二首派台歌演歌揀得好：Flamingo曲式直頭可以放係珠光寶氣片尾播，而且易上口易記，問題係你地班偉大既電台人播唔播嗟！
－Mr.終於派埋戰禍！呢首有火氣又極具流行潛力，無謂浪費丫！Ivana派埋玻璃色當然好，舒舒服服，不過呢首唔多似會被熱播；Juno選擇八陣圖與旅客就有ｄ奇：俾我會揀歪或者嘔吐囉。
－原本阿Kay隻Binary可以慢慢攤長黎Plug，奈何年底發神經咁就浪費私隱線與及港女的幸福星期日，不過絕對可以派埋入型入格丫！橫掂最近壹周刊訪問周博賢好精彩播！Anyway，全新派台作祝英台又係掂！十七度幕後班底，表面簡簡單單小調作品，實質周博賢以祝英台角度寫男女平等，旋律動聽歌詞並非表面的情情塔塔，睇怕又好易成為另一大熱作。
－唱片方面，依家常聽方大同何韻詩蘇永康，王力宏仲未介紹真係唔好意思，梁文音亦好想寫，李克勤有ｄ失望，不過今日終於王若琳到手，聽過兩次，佢一手包辦曲詞果隻碟精彩呀！依然建議大家繼續支持王若琳，真係有料到！
－好，月底再寫，揀揀今月十首歌。
