以前跟家人一起住，會時常覺得房外家人看電視很嘈吵，又或者又與兄弟姊妹同房被干擾，又或者父母久不久又入來看看你情況，好像永遠不能集中精神溫習或者做功課。圖書館？我從小就不喜歡到圖書館，那裡太靜，太適合我睡覺。非常諷刺的是：這年半再次讀書，到圖書館借書搵料的次數比起我讀Undergrad那三年還要多。
一個人住又如何？我這三天的工作過程是這樣的：起床不算遲，落街食個早餐回來上網看報紙，看完準備開工，讀了幾頁Journals又坐唔定，到洗手間小解突然走去洗廁所省浴缸，然後拿地氈去洗。
好了，再次坐定定睇書，睇兩睇，手痕上網，幸好只是看一看然後繼續工作，噢，肚餓，不如煮個麵啦！
煮完食麵又開著電視，咦？呢個想睇！於是又用了半小時。
埋位再次睇書，睇兩睇，眼皮很重。嗯，與其死撐，不如小睡叉足電再戰吧！
因為早上吃早餐到超市入貨時突然癮起想煮飯，買了菜，於是晚上忽然玩煮飯仔，用上比平日半小時完成多倍幾的時間煮飯吃晚飯兼洗碗，勁！
終於十點幾坐定定再睇書，唔夠兩個鐘，心思思上MSN，一玩，兩粒鐘。點幾鐘，眼訓，訓！
第二天比第一天好，因為死期近，不過溫得太悶回老家探探姪女跟她玩玩，然後媽媽與她一起到我家坐坐，嘻嘻哈哈跟姪女玩得好不開心，她們走後再次工作。
兩個鐘後，弟弟來電夠鐘吃飯，回老家去叫了外賣，一吃再加Hae兩Hae，又無左兩個鐘。
回來，乖乖看書，咦？夠鐘睇波！結果，我那二千字，是昨晚凌晨兩點才寫了百幾字。
今天知道不能再Hae，於是開了Turbo，Well，根本肯乖乖坐下做的話，五個鐘，乜都做得晒！
一個人住是否真的好容易「咪咪摸摸」Hae走時間呢？講真，其實因為個人Discipline不夠好，沒有乖乖修心養性吧了！
天氣回暖，應該不能再這樣懶了，話咁快又考試，你話驚唔驚？
