香港新浪網 MySinaBlog
« 上一篇 | 下一篇 »
AlexBB | 19th Jul 2016 | All About Dining | (514 Reads)
本身鍾意泰國菜,所以今次盡情食,而唔會食重覆既餐廳。當然,工作需要有時就搵附近餐廳,不過因為住Centara Grand,樓下就係Central World,餐廳選擇實在多到不得了。

呢篇,先介紹兩間好多遊客食既泰菜名店,睇睇我食過又點。第一晚,原本想食Nara,但訓醒殺到落去,九點鐘,仲有幾批客等檯,而佢地九點四截單,即係叫我唔好等。咁就行左去就近既Mango Tree Bistrobar,皆因果頭仲營業既泰菜餐廳無乜。

呢餐,基本上係不停食蝦蝦蝦蝦蝦。

冬蔭功,無理由第一餐唔點架!咪睇佢個顏色無乜特別,實質都幾辣,而且好多料,新鮮架播。價錢唔算平(相比泰國其他食店)不過真係好飲,同埋底下果個火,好猛。

雜錦海鮮香辣意大利麵,唔係少辣係都幾辣,味道調教得好好,辣與茄香都有,而且意大利麵軟硬適中,一邊叫辣一邊照食。


呢個係乜?巨型炸蝦丸,又係辣架!加上青檸汁,外脆內啖啖新鮮蝦肉,睇到啦,外面脆漿好薄,真心整得唔錯架!

係,大部份貴餐廳水都係要錢。呢餐,HK$175。

第二日開工,呢邊同事知我尋晚食唔到Nara,竟然走去訂位食晏,於是,完成一個願望。Nara呢唔係唔好食,而係味道唔夠地道,遷就遊客咁囉。

海鮮粉絲沙律,我發覺呢邊粉絲沙律全部都係熱既,呢間,份量唔大,味道不錯,而泰國食得既海鮮新鮮都係好基本條件。

炒苦瓜葉,第一次食播!估唔到幾好食,完全無苦味,感覺清新。

我指定要食生蝦咁當然有啦!新鮮彈牙,不過個汁就略嫌偏甜左少少。

下面個炸魚餅唔特別提,上面果個極極極鍾意!即係我好鍾意食泰式basil炒豬肉碎,呢個就將呢種豬肉碎變成大波波,啖啖都係我至愛,仲保持好Juicy,讚不絕口呀我。

同事點左椰汁雞湯,我都係鍾意冬蔭功多少少。

唔駛介紹啦!其實本人唔係特別喜愛食Pad Thai,但呢個炒得好有鑊氣又多料。

我係泰國真係至愛檸茶,因為檸檬與青檸味配合得好好,間間都好飲架播!

自己睇番都好掛住,之後再介紹我食過乜。
Related Posts Plugin for WordPress, Blogger...