懶得逐段寫，不如再次同Point Form，簡單易明：
- 究竟邊個咁有諗頭繼續俾曾志偉打頭陣唱歌？上年好似又係咁，今年雖然捉多個大陸巨肺孫楠，但畫面與聲音都係令人有轉台衝動，唔掂！
- 其實造賽果無人怪無線，你地有班品味獨特既音統小組嘛！不過唔該真係唔好令人Ｏ咀兼Ｒ爆頭至得架：我無預計大同會有乜好下場，不過Love Song輸俾Twins死剩種都明，但係表演嘉賓孫楠果首真係，俾我係Eason，嬲死！
- 搵幾位有番咁上下年資歌手抽新人出黎唱其實係一個幾好玩既Idea：你睇：一開口就知道邊個唱得邊個走得，黃宗澤同果位方乜油真係仲衰過人落Ｋ唱歌，王祖藍係百分百ＫＯ古巨基，估唔到係彭紀諺同金山豆日青唱得唔錯，唔錯又點丫，我想講我呢排行二手舖成日見到彭先生隻碟新簇簇三十五蚊咋！
- 關關呢單真係零九年最估佢唔到事件，其實睇到幾樣野：小關小姐旁邊既歌手無捉住佢架咩？無線點解真係有首歌俾佢呢？我好鍾意首歌，同時佢真係唱得同值得囉獎，但呢度係無線播！要分都唔會分到俾你啦！仲要接住頒，成個畫面咪又囉足娛樂性同話題性囉！你睇！喊得真過勁過你叱吒添呀！
- 其實有冇人計過百老匯加容祖兒囉左幾多年最受歡迎廣告歌獎呢？我幾鍾意首超級星架其實！
- 果班過江龍盼盼糖，真係想死：樣，唔掂；跳，唔掂；唱，唔掂，點解又會紅？佢地見到係叱吒谷極眼淚唔出既威廉陳果段舞Solo唔知有冇啞晒同埋想快ｄ番入後台呢？不過我想講，威廉陳，番去練好ｄ歌，你唱歌真係好麻麻，另一位MK新人係叱吒同你又唱又跳，人地真係唱到架播！
- 點解唔俾Elise囉金獎呀！我好想睇佢唱歌架，呢排成日係無記收費台聽到佢改火柴天堂，我真係唔識俾反應，好想聽佢唱現場嘛！
- 都話我同香港樂壇脫晒節：果位有ｄ似曬黑左既Maria叫可嵐呀可？果首歌係乜黎架？
吳奇隆黃伊汶我識呀！佢係咪黎錯地方呀！佢係哈囉喂出現會岩ｄ囉，無論歌衫同表演都夠嚇人，最後想問：果首最難過今天係咪乜野劇集主題曲黎架？
- Eason好野！你圈我丫嘛，我咪唔講唱歌囉！容小姐知道自己囉亞太果下兩腳一伸係乜野意思呢？不過真係要讚佢今年講野得體好多，同埋著衫順眼好多。更加要讚係無線無夾硬擺阿Sa上檯，例如得佢一個都夾硬俾幾個獎佢，核突嘛！
- 黎喇！無記條數計得真係妙：四個男女歌手分別由環球系（新藝寶Eason）金牌系（基仔）英皇系（容祖）與及東亞系（千嬅）奪得，然後金曲金獎順應民意，你睇，最受歡迎男女歌手個得獎反應真係近年罕見戲劇性同真情流露，呢班友都係資深歌手，咁都俾你無線攪到喊晒口，你話你TBB係咪勁丫！
- 楊千嬅值唔值就真係唔駛我講喇，大家亦唔好諗到無線為左唔想容祖破梅姐紀錄而頒俾千嬅，更加唔好估係唔係因為千嬅今年簽番做歌手既獎勵，但求佢囉得黎全場反應好佢又俾多個經典囉獎場面大家，無線開心，大家開心，係容祖可能麻麻地開心嗟！講番楊小姐，係咁多個騷唱撈月亮的人唱得最似樣既一晚，唱小城大事亦明顯有練過歌，明日再會唔好講啦！希望佢快快離開黎生魔掌，做好音樂啦！
- 至於基仔，同千嬅一樣，都係至紅果年無得囉，依家係呢個時勢俾佢（除左唱片公司分獎之外，李克勤未出碟，張敬軒今年唔得，Eason只出國語碟）。睇得出佢激動，同埋佢激動好過講爛gag同係咪小兒科，基仔，你唔細架喇！
- 無記計得最錯就係：既然知道男女歌手咁好睇，就應該將金曲金獎改之前頒啦！攪到阿Kay果度變左反高潮，佢又唔會激動，雖然佢唱果陣後面唔少歌手跟住唱。
- 最後有條問題：衛蘭係咪今年唔會出席所有頒獎禮架？
