WHAT TO SAY?
首先講樣好Out既先：我知道台灣超級星光大道已經玩到好似第五季，但我係無線收費電視台依然睇緊第二季，仲覺得好好睇添！於是，當中六強陸續出碟之際，我就更加有興趣聽。而依家播到最後幾名，至今我最最欣賞係林宜融！淡定，唱歌感染力強，聲線好舒服，而且又識拉小提琴。正當我奇怪好幾個已經出碟而佢無既時候，原來佢係台灣出左本書附上佢拉小提琴既唱片。不過，我真係等佢出碟，佢唱歌真係好好聽。
講完人地咁多姿多采台灣樂壇，講番香港呢邊有幾得人驚：馮德倫又唱歌！唔知乜事派國語歌上台，幾年前唔識唱歌，幾年後當然唔會突然進步，證明佢同莫小姐一齊多年無交流過音樂；劉華大帝原本呢一兩年唱小品舒舒服服，至少我唔會反感，但最新派台歌I Wish攪乜鬼？又用粵劇腔，破壞晒成首歌既感覺呀！
有時報紙雜誌要寫鱔稿無可厚非，但都不能夠太離譜：新城分豬肉記者招待會，阿Sa姐有得成為唔知乜鬼勁爆後選歌手令人R頭，蘋果夠膽死係登佢張相下面落以下Caption：「阿Sa今年樂壇成績有目共睹，成為勁爆候選歌手實至名歸」下？佢今年有乜成績呀？除左陪阿嬌出黎天真傻之外仲有乜野樂壇成績呀？唔好話我知未卜先知將一首幾個月前派台既Make a wish整個聖誕版派台會突然大熱成為十大金曲咁得人驚呀！
西歌詞王高皓正有全新作品，就係范萱蔚全新歌曲冬甩，歌詞好正路一ｄ都唔西，今次係要讚佢個歌名好有創意：冬天俾人飛甩，為之冬甩，多謝晒。
我諗金融海嘯有個好處就係令到一班上左岸既歌手要出黎搵食：張學友先生，下年會推出廣東唱片喇喂！
看見坊間有一班朋友大讚衛蘭新碟，於是走去試聽，結果是，個人認為，真係幾悶。就算大家話好好聽我抱住好大期望去聽既最近派台歌就算世界無童話，我都感動唔到。睇黎，佢真係要轉唱片公司，唔好浪費佢一把好歌喉。
順便一提：如無意外我應該會在年底年頭寫寫個人年度廿首歌曲與及十張至愛唱片，毫無指標純粹個人喜好，有興趣就留意下。
MY TOP 10 CHOICES
01. 當女飛俠愛上萬能俠--楊千嬅
(曲/編/監:陳奐仁 FOR THE INVISIBLE MEN 詞:林若寧)
－好簡單：全碟至醒神至精彩一首歌，有突破而且唱得夠投入，雖然有日行過電腦商場見到個MV嚇親我。BTW，果晚轉台見佢唱撈月亮的人，唉．．．
02. Move It--歐陽靖
(曲:Sacha Baron Choen 詞:歐陽靖 編:Dylan Dresdow)
－歌詞並唔特別精彩，好玩既係人肉扮八十年代Remix果隻跳線Feel，懷舊得黎又有心思。
03. 港女的幸福星期日--謝安琪
(曲/編/監:Eric Kwok 詞:黃偉文)
－係咪唱片公司一心同電台死過，派歌派得咁密，唯一解釋就係偉大港台唔敢播私隱線，純粹猜測。講番呢首歌，絕對係黃偉文繼婦女新姿之後另一力作，雖然不及前作精彩，但已經夠班。
04. 今夕是何年--李克勤
(曲:方大同 詞:林若寧 編:馮翰銘 監:Alvin Leong)
－喜歡編曲，特別是開首的和唱；歌詞很有詩意，但需要時間消化，難得的好歌。
05. 等不了--Mr.
(曲:Alan Po/Ronny 詞:Ronny 編:Mr. 監:Gary Tong)
－終於在二手舖以四十幾蚊買入，然後一聽愛上Mr.：聲線夠出歌詞聽得好清楚而且有風格，Rock得黎唔會嘈嘈閉，我會寫寫呢隻碟。
06. 花不痛--古巨基
(曲:蔡健雅 詞:林夕 編/監:雷頌德)
－教人放下別執著一切的歌曲，一切自有照料，基仔比起之前兩首派台歌唱得更自在，聽得舒服。
07. 美空雲雀--何韻詩
(曲/編:陳奐仁FOR THE INVISIBLE MEN/何秉舜@GOOMUSIC 詞:黃偉文 監:hocc@GOOMUSIC/陳奐仁FOR THE INVISIBLE MEN/何秉舜@GOOMUSIC)
－音樂感覺很步步推進的盪氣迴腸，歌詞就像形容被困在病房裡望出窗外的一絲盼望，配合唱片主題，其實是有希望的一首歌。Chorus真係好高音，阿詩Moov Live唱成點呢？
08. 如果愛--方大同
(曲:方大同 詞:方大同/徐若瑄 監:方大同/Edward Chan/Charles Lee)
－商台真係夠支持音樂就俾方大同囉男歌手金獎，今年Eason有幾Hit，古巨基夠唔夠佢爆？你地問心！
09. 離別曲--陳珊妮
(曲:Chopin 詞/監:陳珊妮 編:羅恩妮)
－抱歉仍未寫呢隻碟，真係要的起心肝介紹，年度十大至愛之一。
10. 假使不可一起安息--麥浚龍
(曲:麥浚龍 詞:周耀輝 編:禇鎮東 監:金培達)
－好聽同時應該幾Lum女既一首情歌，Juno真係唱得好。
MY RECOMMENDATION
最近買左好多碟：趙學而《聽》不得不買；何韻詩新碟好精彩；Mr.首張大碟非常出色，連計未寫既陳珊妮，都係要介紹。
另外買左庾澄慶，有Ｄ失望，唔係咁精彩；偶然一次hmv試聽今日終於買左馮曦妤，好似睇緊電視廣告片咁，首首都熟口熟面廣告聽過，佢把聲唔錯，但唱歌真係要再進修一下，有D歌真係Handle得唔係咁好。
MY RETRO RECOMMENDATION
聖誕來臨前送上幾首應該無派台而同聖誕有關既歌。以下兩首係由兩位當年唔唱得既歌手唱既，同時咁岩又係慘情聖誕歌：
鄭伊健先生夜還未深，十幾年前一張好好聽既唱片（唔代表佢唱得好），呢首聖誕慘情歌，孤家寡人，幾好Feel架。
呢首，苦主周慧敏小姐唱俾自己聽應該非常應境，慘過乜：沒法盡信今朝你沒變，係囉，醒啦，女！
之後兩首係兩位唱得之人，同時兩首都係開心甜蜜情歌，Balance一下：
來自學友這個冬天不太冷大碟有呢首當年好多人都覺得唔派台徙晒既Merry Christmas I Love You，一直都覺得好聽過學友作曲派台既這個冬天不太冷，呢首，真係甜蜜嘛！
最後送上係梅姐是這樣的大碟一首Side Track愛情來了報佳音，希望你係今年聖誕等到佢出現，終於找到Love。
希望你地鍾意呢幾首聖誕歌。
