過往的電視劇時常聽到這一句：「咩呀？我有份納稅架！我有份出糧俾你架！差佬大晒呀！」又或者另一句：「呢班友仔有書唔讀走去溝女，真係徙晒我地納稅人Ｄ錢喇！」
身為中產的，永遠覺得自己納稅卻享受不到什麼，偶爾看見這個偉大的政府的政績就更加扯火，早前那些副局長政務助理人工有幾高？現時自己連份工都保唔住，每日聽到這裡炒二百那麼炒二百（係囉，點解成日聽到二百），都咪話唔驚，然後覺得自己納的稅養一個不中用的政府，立時粗口滿天。
泰國包機這件事夠扯火了吧！新聞日日報那些香港人滯留當地求助無援，當地政府有什麼措施我們偉大的政府又不會幫忙通知，到航空公司出手派機到當地接人走這個政府更加懶理，還為不派機到當地救人提出一堆「咁都係理由」的原因，到後來發現死了人，就臨急臨忙補鑊，啊！這班人是否坐著腦袋做人的？
這班人每個月逗幾錢人工？為何被指責時，會好像我們細個做錯事，立即將責任卸走：「呢個係集體決定，唔能夠要求一個人負責啊！」嘩，幾咁核突，你不如跟你個仔入ICU，佢就放學ICU，你就放逐ICU，罰你去泰國黎一次電波老年漂流記。
瘀左衰左已成定局，難得仲有人死出黎替佢地解話！左派高人鄭耀棠今日向記者講既解釋我聽完都Ｏ晒咀：「因為梁展文事件，官員唔敢立即落決定，驚俾人秋後算賬，有邊個敢伸個頭出黎丫！」你痴邊條線呀！咁樣護短都得？你估以前公務員心態，少做少錯唔做唔錯？乜野叫問責制呀？李少光唔係問責官員？佢係咪要落決定呀？唔郁唔出聲埋個頭落地扮鴕鳥呀？
講到扮鴕鳥，偉大曾特首自從同班國際領袖影完相之後，有冇見過佢係香港現身？經濟差裁員處處，佢無出黎發表（可能因為經濟雞魚吹水會一個月一次，會員又有份裁員，費事出黎俾人問到口啞啞）；泰國呢單野，佢有冇出黎回應市民要求，責成佢班偉大官員要拯救香港人呢？無！今朝記者問佢點睇，好似突然失聰，你睇我唔到你睇我唔到，行左去！
呢班偉大官員特首，我都唔會期望經濟發展有乜爆橋救港，呢個係全球性問題，佢咪發神經派現金券已經還得神落（我唔贊成咁派錢，因為對整體經濟無幫助），但，危機處理差成咁，真係令人覺得失禮－－點解堂堂一個香港，有班咁既蛋散係度治港？無法子，我唔知怨邊個，因為唔係我投票選佢地出黎，佢地做錯事，問責制係得個嗡字，立法會班大哥大姐至多可以向有關官員提出不信任動議，但結果係non-binding，要偉大既特首處理，更偉大既中央拍板。問責制就係咁喇！所以越養越多人，仲要做唔到野，你話扯火唔扯火？？
講番轉頭：原來我納稅俾警察，佢會走去借查案攪女仔架！係呀，我依家擺到明玩上綱上線，因為個政府廢，真係乜都賴得一餐！
