香港新浪網 MySinaBlog
« 上一篇 | 下一篇 »
AlexBB | 10th Jun 2016 | All About Music | (1018 Reads)
剛過去的五月,首先要講,能夠如此近距離欣賞Damien Rice實在非常感動:在灣仔一個細場館,在場相信得幾百人,而主角一個人幾支彈他幾樣樂器唱足成晚,由8:50pm唱到11:10pm,好正!認識佢,因為朋友介紹,知我當時情緒低落,但同時提醒我,聽Damien Rice可能會更Depressed。是的,所以對於佢既歌,佢既歌聲,對我來講,是有發生過的一回事。

另外出席盧冠廷新碟試聽會,以為有人唱,點知無,其實係高級音嚮品牌所辦,的確聲係好靚不過好彩我唔會追靚音質否則破產都唔掂。至於呢隻碟,兩首新歌八首翻唱,選曲有好好好穩陣有驚喜,但因為盧冠廷真係好認真處理,由編曲到唱都帶俾我好不一樣既感覺,所以呢張Beyond Imagination Too,好聽!

呢個月亦買左好多碟:徐佳瑩日全蝕演唱會Live CD有少少失望因為好似狀態並非最好;洪卓立,從來無買佢碟,呢隻雙CD精選好唔錯,發現唔少好聽既作品(除左有某網絡達人featuring果首),佢俾我感覺似梁漢文,歌路有局限,但唱情歌實在好聽,歌聲舒服,要突圍大紅大紫外型與歌路上有限制。仲有入左蘇運瑩與及盧廣仲,訂左艾怡良林宥嘉咁囉。噢,仲有曹格新碟,對唔住,幾失望下。欣宜梗係有買啦,一定會寫。

聽下歌啦不如:

Super Girls有事發生:當薛凱琪隻快歌聽到我耳都側,呢首有人介紹,咦編曲豐富,就算好多元素(包括懷舊)都唔會亂咁黎,而最重要首歌聽得爽又過癮。夏天,要聽快歌。

張敬軒羅賓:改編歌,呢種快歌節奏對佢黎講好岩,而且阿Y填呢首詞好玩:為一眾一直當個最佳助理的配角寫出心聲,而且軒仔唱得入型入格生鬼有趣,可喜見到有咁既突破。

J.Arie愛的履歷:當幾位新生代女歌手都今年有代表作佢都要發力,於是黎一首旋律好易大熱既作品。其實我唔鍾意歌名,歌詞可以,首歌好K,不過佢真係唱得好好令首歌加晒分。唔知點解一路聽Chorus,我會想起「如讓你吻下去,吻下去」

JW自由飛翔:唔知佢地派歌今次係咪有Story line呢?呢首剛好就係振作後如何鼓勵自己好好愛自己,舒服,自強,正能量得來自自然然,好耐聽既一首歌。

陳潔儀別問我為什麼愛你:是咁的,葉良俊發現自己有一首作品當年哥哥錄左但無推出過,然後就交左俾阿Kit唱。廿年前既作品,換上big band jazz感覺,電影感非常地來一個延續對哥哥既思念。

周興哲想回到那一天:台灣新生代唱作歌手,出道至今最最最hit都係以後別做朋友,我亦熟到識背。最近聽到呢首,都係同電影電視有關歌曲,好聽既情歌。

盧廣仲一定要相信自己:隻碟聽左兩三次,好舒服,呢隻係一聽我就記得,可能因為歌詞好有意思。一定要相信自己,嗯,早排先寫完一篇之嘛。
Related Posts Plugin for WordPress, Blogger...