香港新浪網 MySinaBlog
« 上一篇 | 下一篇 »
AlexBB | 12th Feb 2016 | All About Music | (807 Reads)
通常頒獎禮與及年頭都比較少歌,何況近年情況平日都少?我就唔係唔記得寫,而係實在最近心情真係唔太適合寫,都係果句,總之自求多福,大家執生。

講到社會,我不得不推介大家買盧冠廷最新三CD精選《Masterpieces since 1982》,點解?盧冠廷多年來唱作不少有關社會歌曲,年紀輕時去聽,到依家經歷多左,世界情況唔同左去聽,實在感受好深;另外,唱片收錄唔少佢寫俾人既作品,同時佢既作品亦好精好齊,仲有1990年演唱會精華dvd(十六首歌),絕對值得珍藏。

無論世事變改演唱會都繼續有人開:我應該係第一次會錯過林憶蓮演唱會,因為復活節假期對於我實在好忙,得果一晚亦已經飛左,不過作為歌迷,老老實實,無新歌情況下對此演唱會期望不高;明哥演唱會好想支持,不過同樣地,不在港,殘念;謝安琪應該會睇,望望會唔會加場;至於關淑怡,上次有睇,頭半好驚後半好好,好似面書朋友寫,睇佢演唱會就好似買大小,咁再了解啦。慧嫻姐好似賣得幾好?著實佢隻碟幾唔錯既;黎明?林峰?不如尹光丫!仲有一個一定要介紹:音樂峰人園音樂會,一峰二汶李拾壹黎曉陽黃靖,四月八日,買飛呢處

唱片,有Rubberband,李榮浩同Supper Moment應該會寫,後者其實終於聽番過去作品,應該我會去搵番對上兩隻碟黎買;另外早前係Sportify聽左謝震廷,超級星光大道第一季果位小朋友依家大個仔成為唱作歌手,推出首張唱片《查理》,喜歡,等緊寄黎,會介紹。

講下派台歌
係,唔會再貼榜,一來我懶,二來無乜價值。一月派台歌,嚇死你:有翻唱既世間始終你好痴情意外如夢初醒,有上年陳奕迅先生隻碟家陣仲派台都幾悶既黑洞,三位天王都派上電影歌曲即係可以唔聽(學友果首停格其實唔錯不過,套戲咁,我Skipped),當然仲有英皇年年都出仲出碟(其實好懷疑點解年年出賀年碟)既賀年歌,你,唔係有興趣聽下話?咁不如我介紹呢隻俾大家賀年啦:

次次搭巴士見到都係無聲版唔多膠興?呢個醒大家既!

李幸倪雙雙:聽佢簽左環球聽左成年,終於有派台歌。唔能夠話Eric Kwok呢首曲好高水準,不過曲加詞配上唱,好唔錯,易上口亦唔會太過行貨,當然咁俾心機拍個MV係加分既。

關心妍像我這樣的一個雅茲迪女子:市面好耐無呢類為世界戰亂而唱既歌曲,呢首盪氣迴腸而無過火,感動而正面。

謝安琪山林道:演唱會後休息一年,呢首作為十周年歌曲,我聽到唱出果份堅定與投入,永遠只有在其廣東作品先有呢種感覺味道與共鳴感。

張敬軒緋荔榭。少年:應該係佢隻碟最好聽最打動我既作品,雖然是唱給舊居,但同時也為自己來個檢視過去,最純真自然的情懷。

李榮浩有理想:第一Plug唔係太合心水,呢首好得多喇,爽而醒神,雖然,我都同意,Intro令我想起Move Like Jagger。
Related Posts Plugin for WordPress, Blogger...